واٹس ایپ گروپس کے لیے 3 نئے فیچرز متعارف
اسلام آباد (ویب ڈیسک) – واٹس ایپ نے گروپ چیٹس کو مزید بہتر بنانے کے لیے تین نئے فیچرز متعارف کرائے ہیں۔ میٹا کی جانب سے جاری کردہ اپ ڈیٹ کا مقصد گروپ گفتگو کو آسان اور زیادہ منظم بنانا ہے تاکہ صارفین بہتر طریقے سے فیصلے کر سکیں اور اہم معلومات کو آسانی سے شیئر کر سکیں۔
یہ اپ ڈیٹ خاص طور پر بڑے گروپس کے لیے انتہائی مفید ہے، جہاں معلومات کا بہاؤ بہت زیادہ ہوتا ہے اور اہم پیغامات اکثر کھو جاتے ہیں۔ آئیے ان تینوں فیچرز کو تفصیل سے جانتے ہیں۔
@all مینشن فیچر
سب سے اہم اور طویل انتظار کا فیچر @all مینشن ہے۔ اس فیچر کی مدد سے صارفین اب ایک ہی بار میں گروپ کے تمام اراکین کو نوٹیفائی کر سکتے ہیں۔ پہلے لوگوں کو ہر ایک کو الگ الگ ٹیگ کرنا پڑتا تھا، جو بڑے گروپس میں بہت مشکل کام تھا۔
یہ فیچر خاص طور پر ان اعلانات کے لیے ہے جو فوری اور اہم ہوں، جیسے آفس یا اسکول کی بندش، کسی ایونٹ کی آخری تاریخ، یا پروگرام میں اچانک تبدیلی۔
اہم شرط: جن گروپس میں اراکین کی تعداد 32 سے زیادہ ہو، وہاں صرف ایڈمنز ہی اس فیچر کو استعمال کر سکتے ہیں۔ اس کا مقصد اس فیچر کو غلط استعمال سے بچانا ہے۔
اگرچہ @all نوٹیفکیشن میوٹڈ گروپ میں بھی ظاہر ہوتا ہے، لیکن صارفین اسے اپنی سیٹنگز میں جا کر بند کر سکتے ہیں۔
پولز میں بہتری
پولز فیچر کو بھی کافی بہتر کیا گیا ہے تاکہ گروپ میں فیصلے کرنے کا عمل مزید آسان ہو سکے۔ اس میں تین بڑی تبدیلیاں کی گئی ہیں:
- پول کی آخری تاریخ: صارفین اب پول کی آخری تاریخ (Expiary Time) مقرر کر سکتے ہیں۔ جس کے بعد ووٹنگ خودکار طور پر بند ہو جائے گی۔ یہ خاص طور پر اس وقت مفید ہے جب کسی میٹنگ یا تقریب سے پہلے فیصلہ کرنا ہو۔
- گمنام ووٹنگ: اب صارفین ووٹرز کی شناخت چھپا سکتے ہیں تاکہ لوگ بغیر کسی جھجھک کے اپنی رائے دے سکیں۔ یہ فیچر ان لوگوں کے لیے بہت فائدہ مند ہے جو دوسروں کے سامنے اپنی رائے ظاہر کرنے میں ہچکچاتے ہیں۔
- پول میں ترمیم: پول بنانے کے بعد 15 منٹ تک صارفین اس میں ترمیم کر سکتے ہیں۔ اگر کوئی ٹائپو یا غلطی ہو جائے تو اسے درست کیا جا سکتا ہے اور دوبارہ نیا پول بنانے کی ضرورت نہیں پڑتی۔
ایک کلک پر نیا گروپ بنائیں
تیسرا فیچر "Create a Similar Group” آپشن ہے، جس سے صارفین کسی موجودہ گروپ کے اراکین کو دوبارہ منتخب کیے بغیر ایک کلک پر نیا گروپ بنا سکتے ہیں۔
یہ فیچر اس وقت بہت کام آتا ہے جب آپ کسی بڑے گروپ سے کوئی چھوٹی ٹیم بنا کر کوئی پرائیویٹ بات کرنا چاہیں، جیسے کسی پارٹی کی پلاننگ کرنا، یا کسی ایونٹ کی کوآرڈینیشن کرنا۔ اس سے بڑے گروپ میں غیر ضروری میسجز کا بوجھ بھی کم ہوتا ہے۔
فیچرز کی دستیابی
یہ تینوں فیچرز دنیا بھر کے واٹس ایپ صارفین کے لیے مرحلہ وار (Gradually) جاری کیے جا رہے ہیں اور آنے والے ہفتوں میں تمام صارفین تک پہنچ جائیں گے۔ ان فیچرز کو استعمال کرنے کے لیے واٹس ایپ کا تازہ ترین ورژن انسٹال ہونا ضروری ہے۔